ខេត្តកំពង់ស្ពឺ៖ ដោយអនុវត្តតាមគោលការដឹកនាំដ៏បុិនប្រសប់ ឈ្លាសវៃនិងគុណធម៌របស់ ឯកឧត្តមនាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទនិងជាមេបញ្ជាការកងរាជអាវុធហត្ថលើផ្ទៃប្រទេស ព្រមទាំងមានការណែនាំដោយផ្ទាល់ពីសំណាក់ ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ ក្រោមការយកចិត្តទុកដាក់ គិតគូររបស់លោកឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺ បន្ទាប់ពីទទួលបាននូវព័ត៌មានពីក្រុមការងារមូលដ្ឋានស្រុកបសេដ្ឋថាមានប្រជាពលរដ្ឋមួយគ្រួសារមានជីវភាពខ្វះខាត ជួបការលំបាក។
ក្រោមស្មារតីមនុស្សធម៌ កាលវេលាម៉ោង១៤.០០នាទីរសៀល នាថ្ងៃទី១២ ខែមីនា ឆ្នាំ២០២៦ លោកឧត្តមសេនីយ៍ត្រី ម៉េង ស្រ៊ុន មេបញ្ជាការ បានអញ្ជើញដឹកនាំក្រុមការងារកងរាជអាវុធហត្ថខេត្តកំពង់ស្ពឺ និងមានការចូលរួមយ៉ាងសកម្មពីសំណាក់ក្រុមការងារសហភាពសហព័ន្ធយុវជនកម្ពុជាខេត្តកំពង់ស្ពឺ រួមទាំងមានការចូលរួមពីរអ្នកស្ម័គ្រចិត្តកាកបាទក្រហមកម្ពុជាខេត្តកំពង់ស្ពឺ និងក្រុមការងារអាជ្ញាធរមូលដ្ឋាន បន្តចុះសួរសុខទុក្ខ ប្រជាពលរដ្ឋមួយ១គ្រួសារ ជួបការលំបាក ខ្វះខាតក្នុងជីវភាពរស់នៅ ទទួលបន្ទុកចិញ្ជឹមកូន០១នាក់ និងចៅ៦នាក់ ជាបន្ទុក។ដោយគាត់មានឈ្មោះ នង វណ្ណនី ភេទស្រី អាយុ៥៨ឆ្នាំ បច្ចុប្បន្នរស់នៅក្នុងភូមិត្រពាំងទន្ទឹម ឃុំពោធិ៍ចំរើន ស្រុកបសេដ្ឋ ខេត្តកំពង់ស្ពឺ។
ជាទឹកចិត្តជួយគ្នាក្នុងគ្រាលំបាក លោកឧត្តមសេនីយ៍ត្រី ម៉េង ស្រ៊ុន បានបរិច្ចាគថវិការផ្ទាល់ខ្លួនចំនួន ៤០០,០០០៛ និងសម្ភារៈគ្រឿងឧបភោគបរិភោគរួមមាន(អង្ករ ៥បាវ,មី ៥កេស,ទឹកសុទ្ធ ៥កេស,ទឹកត្រី ៥យួរ,ទឹកស៉ីអ៉ីវ ៥យួរ,ភេសជ្ជៈ ៥កេះ,ត្រីខ ៥យួរ និងកង់ចំនួន៣គ្រឿងថែមទៀតផង៕
