ពលរដ្ឋដែលរងគ្រោះដោយខ្យល់កន្ត្រាក់បណ្តាលអោយខូចខាតដំបូលផ្ទះចំនួន ៧គ្រួសារនៅស្រុកស្អាង ទទួលបានជំនួយសង្គ្រោះបឋមពីកាកបាទក្រហមខេត្តកណ្តាល

ក្នុងឱកាសអញ្ជើញចុះជួបផ្ទាល់ជាមួយបងប្អូនប្រជាពលរដ្ឋទាំង ៧គ្រួសារដែលរងគ្រោះនៅថ្ងៃទី ១៤ ខែឧសភានេះ ឯកឧត្តម គួច ចំរើន អភិបាលខេត្ដកណ្តាល និងជាប្រធានសាខាកាកបាទក្រហមខេត្ត បានពាំនាំនូវការសាកសួរសុខទុក្ខពីសំណាក់សម្តេចគតិព្រឹទ្ធបណ្ឌិត ប៊ុន រ៉ានី ហ៊ុន សែន ជូនទៅដល់បងប្អូនដែលរងគ្រោះ ដោយសម្តេចតែងបានណែនាំជាប្រចាំអោយមន្ត្រីកាកបាទក្រហមស្រុក និងខេត្តត្រូវពិនិត្យមើល និងជួយដោះស្រាយរាល់ទុក្ខលំបាកបងប្អូនប្រជាពលរដ្ឋជានិច្ច ។ ឯកឧត្តម គួច ចំរើន ក៏បានបញ្ជាក់ដែរថា កាលផ្តល់ជូនជំនួយសង្រ្គោះបឋមជូនបងប្អូនទាំង៧គ្រួសារនេះ គឺជាលើកទី២ហើយ ដោយកាលពីពេលកើតហេតុភ្លាមៗ ក្រុមការងារកាកបាទក្រហមស្រុកស្អាងបានយកជំនួយមកផ្តល់ជូនម្តងហើយ ។ ឯកឧត្តមក៏បានផ្តាំផ្ញើដល់បងប្អូនទាំងអស់ ដោយសារនៅពេលរដូវវស្សា ដែលអាចមានភ្លៀងច្រើន ដែលអាចមានទឹកលិចនៅទីតាំងមួយចំនួន ដូចនេះបងប្អូនត្រូវថែទាំថែសុខភាព និងធ្វើអនាម័យផ្ទាល់ខ្លួន ព្រមទាំងត្រូវប្រុងប្រយ័ត្នលើបញ្ហាសត្វពស់ និងសត្វមានពិសផ្សេង ដោយក្នុងនោះឯកឧត្តម ក៏បានណែនាំដល់មន្ត្រីសុខាភិបាលត្រូវផ្តល់ថ្នាំពស់ចឹកមកដល់ស្រុក និងមូលដ្ឋានដើម្បីការពារក្នុងករណីចាំបាច់ផងដែរ ។ ជាមួយគ្នានេះដែរឯកឧត្តម គួច ចំរើន ក៏អំពាវនាវអោយបងប្អូនប្រជាពលរដ្ឋត្រូវ ប្រុងប្រយត្ន័អំពីជំងឺកូវីដប្រភេទថ្មីដែលកំពុងកើតមានច្រើននៅប្រទេសជិតខាងយើង ដោយក្នុងនោះក្រសួងសុខាភិបាលក៏ទើបបានចេញសេចក្តីជូនដំណឹងពីបញ្ហាជំងឺកូវីដថ្មីនេះដែរ។

សូមបញ្ជាក់ថា ពលរដ្ឋដែលគ្រោះដោយខ្យល់កន្ត្រាក់ទាំង ៧គ្រួសារខាងលើនៅពេលនេះ ដោយក្នុង១គ្រួសារៗទទួលបានជំនួយសង្គ្រោះបឋមពីសាខាកាកបាទក្រ

ហមខេត្តកណ្តាលនូវអង្ករ ទឹកត្រី ទឹកស៊ីអីវ ទឹកសុទ្ធ ត្រីខ មី កៅស៊ូតង់ និងឃីដមួយកញ្ចប់ ព្រមជាមួយនឹងថវិកាចំនួន ៣០មឺនរៀល ។